107. [1522. 08]

Универсал, писаныи до всих обывателеи Вел(икого) Княз(ства) Лит(о)в(ского), з стороны еханя на службу земскую, а которыи бы не ехал, тотъ мелъ имене тратитъ.

Жикгимонт.

Кн(я)земъ н(а)шымъ и паномъ воеводамъ, и старостамъ, наместникомъ и тивуномъ, кн(я)г(и)нямъ и панямъ, вдовамъ и земяномъ, и двораном н(а)шымъ и всимъ заказьникомъ по отъчызне нашои, Великому Кн(я)зьству Литовскому.

Што есмо перво сего, какъ будучы на вальномъ соиме Городенскомъ, со всими паны радами н(а)шыми вбачывшы, ижъ многии подданыи н(а)шы первыхъ годовъ непослушеньство и недбалостъ великую ку обороне земъскои маютъ, и коли мы, чуючы о людехъ непрыятелских, листы н(а)шы писывали, рокъ и местцо покладаючы, ажъбы они конне а зброине на тотъ рокъ на томъ местцы были, и они, на росказане н(а)шо, тамъ не бываютъ, лечь гетманъ нашъ и панове рады водле росказаня н(а)шого ку обороне земъскои напротивъку непрыятелеи парсунами своими напред заставуютъ, а подданыи н(а)шы неборздо к нимъ прыежчаютъ, и иные ся, скоро у гетмана пописавшы, зася безъ воли его домов отъежъчаютъ, а иныи зброи и кони отъсылають, и для того мы отъ людеи непрыятелскихъ в томъ то панстве н(а)шомъ шкоды и впады великие прыимовали.

Якож бачачы есмо таковое непослушенство подданыхъ н(а)шыхъ, и не будучы безъпечни отъ нрпрыятелеи н(а)шыхъ, на томъ соиме Городенскомъ со всими паны радами н(а)шыми и со всими землями поддаными н(а)шыми, // [97v] то установили и моцно росказали, естъли бы которыи с подданыхъ н(а)шыхъ водле росказаня листовъ н(а)шыхъ на положеномъ местцу на рокъ конне а зброине не былъ, або хто пописавшы ся самъ до дому отъехалъ безъ воли гетмана н(а)шого, або бы которыи кони и зброи отъсылалъ, а самъ осталъ у малом почте, а не былъ у гуфе, какъ будетъ у реистре пописан, в таковыхъ мы мели именя ихъ отънимати, и о тои н(а)шои уставе и росказани первеи сего вамъ всимъ, подданымъ н(а)шымъ дали есмо ведати. А прото и тыми разы, естли бы хто з вас, подданыхъ н(а)шыхъ, на тотъ рокъ и местцо н(а)шое положоное, на тую нинешънюю служъбу н(а)шу подле уставы н(а)шое и ухвалы земъское не выехалъ, мы вжо маемъ в тых именя отънимати и тымъ давати, за кимъ будет нас жедати воевода троцкии, гетманъ нашъ навышъшыи, староста браславскии, веницкии, кн(я)зь Костянтинъ Ивановичъ Острозъскии. И вы бы о томъ ведали.

П(и)сан.

Источник:

107. Универсал, писаныи до всих обывателеи Вел(икого) Княз(ства) Лит(о)в(ского), з стороны еханя на службу земскую, а которыи бы не ехал, тотъ мелъ имене тратитъ. [1522.08] //

Lietuvos Metrika (Вильнюс: Изд. Институтата НЭ, 1997), 114.

Подг. Артурас Дубонис. Книга записей № 11 (1518-1523), 228 с. Обл. 1500 экз.